Bugun O‘simliklar karantini va himoyasi ilmiy-tadqiqot institutida ISO 9001:2015 xalqaro standarti bo‘yicha tashkil etilgan o‘quv-treningning so‘nggi bosqichi nihoyasiga yetdi. Bu trening PRIM-0124 loyihasi doirasida Jahon banki tomonidan moliyalashtirilib, CERT Academy trenerlari tomonidan amalga oshirildi. Trening so‘nggi kuni — eng real va eng muhim tajribalarga boy bo‘ldi.

Bugungi mashg‘ulotlar instituting kundalik faoliyatida uchraydigan real audit holatlarini modellashtirish, hujjatlashtirish va tahlil qilishga qaratildi. Trening ishtirokchilari “standart bandiga havola”, “aniqlangan nomuvofiqlik”, “isbot hujjati” va “kuzatuvlar” kabi tushunchalarni nafaqat eshitdi, balki o‘z qo‘llari bilan amalda sinab ko‘rishdi.

CERT Academy ekspertlari tomonidan taqdim etilgan “K–I–T” modeli (Kuzatuv, Isbot, Talab) asosida ishtirokchilar nomuvofiqlik holatini qanday aniqlash, qanday baholash va qanday hujjatlashtirish kerakligini o‘rgandilar. Bunda ularning e’tibori faqat muammoga emas, balki muammoning ildiz sabablariga, uni oldini olishga va tizimli yondashuvga qaratildi.

Real keys misolida omborxona auditidan olingan holat chuqur tahlil qilindi. Kiritilgan interaktiv muhokamalar orqali xodimlar ichki audit — bu “aybdor topish” emas, balki “imkoniyatlar derazasini ochish” ekanini angladilar. Har bir ishtirokchi bugungi mashg‘ulotdan nafaqat auditorlik ko‘nikmasi, balki sifatga bo‘lgan shaxsiy mas’uliyatni olib chiqdi.

Bu uch kunlik trening bizga shuni ko‘rsatdiki:
 - ISO 9001:2015 — bu hujjatlar yig‘indisi emas, balki fikrlash tizimi.
 - Sifat — bu yuqoridan buyuriladigan narsa emas, balki har bir xodim yuragidan boshlanadigan madaniyat.
 - Audit — bu ishonchni mustahkamlovchi, rivojlanishga yo‘l ochuvchi halol mexanizm.

Bugun trening tugadi. Ammo institutda sifatga bo‘lgan yondashuv yangilandi. Bu jarayon yakun emas — bu boshlanish.